بنگلورو، 31 اکتوبر (ایس او نیوز): کرناٹک حکومت نے 2026 کے باوقار کرناٹک راجیہ اُتسوا ایوارڈس کے لیے مختلف شعبوں سے تعلق رکھنے والی 71 شخصیات کے ناموں کا اعلان کردیا ہے۔ ریاست کے قیام کے 71 سال مکمل ہونے کے موقع پر یکم نومبر کو منعقد ہونے والی راجیہ اُتسوا تقریبات میں ان شخصیات کو ایوارڈ سے نوازا جائے گا۔ منتخب افراد میں ادب، فن، ثقافت، لوک فنون، موسیقی، تھیٹر، فلم، صحافت، سماجی خدمات، تعلیم، طب، سائنس و ٹیکنالوجی، زراعت، کھیل اور دیگر شعبوں میں نمایاں خدمات انجام دینے والی شخصیات شامل ہیں۔

ریاستی محکمہ کنڑا اینڈ کلچر کی جانب سے 30 اکتوبر کو جاری کردہ فہرست کے مطابق ہر ایوارڈ یافتہ کو پانچ لاکھ روپے نقد اور 25 گرام سونے کا تمغہ دیا جائے گا۔ کنڑا اینڈ کلچر کے وزیر شیوراج تنگڈگی نے بتایا کہ اس مرتبہ 71 شخصیات کو منتخب کیا گیا ہے، جن میں 12 خواتین بھی شامل ہیں۔ ان کے مطابق انتخاب کے عمل میں پانچ ذیلی کمیٹیوں اور ایک اعلیٰ سطحی کمیٹی نے حصہ لیا۔ گزشتہ دو برسوں سے ایوارڈ کے لیے درخواستیں طلب کرنے کے بجائے مستحق شخصیات کی براہِ راست نشاندہی اور مختلف سفارشات کی بنیاد پر انتخاب کیا گیا۔

اُتّرا کنڑا، دکشن کنڑا اور اُڈپی کے ایوارڈ یافتگان
اس سال اُترا کنڑا ضلع سے ڈاکٹر جی ایس چندرشیکھر کو سماجی خدمات کے شعبے میں راجیہ اُتسوا ایوارڈ کے لیے منتخب کیا گیا ہے۔ وہ آدرش چیریٹیبل ٹرسٹ سے وابستہ ہیں۔ دکشن کنڑا ضلع سے تین شخصیات کو اس اعزاز کے لیے چنا گیا ہے، جن میں میڈیا اور فوٹوگرافی کے شعبے میں فوٹو جرنلسٹ وشواناتھ سورنا، سماجی خدمات کے لیے اکھل بھارت تُلو اوکوٹا کے اے سی بھنڈاری اور ادب کے شعبے میں ڈاکٹر اندرا ہیگڑے شامل ہیں۔

اُڈپی ضلع سے معروف یکش گانا فنکار گوپال گانگا کو یکش گانا کے شعبے میں، جبکہ سینئر وکیل اور کرناٹک کے سابق ایڈوکیٹ جنرل بی وی آچاریہ کو عدالتی شعبے میں ایوارڈ کے لیے منتخب کیا گیا ہے۔

اہم شخصیات میں سابق وزیر کاگوڈو تمپّا اور اداکار اشوک بھی شامل
ایوارڈ یافتگان میں کرناٹک کے سابق وزیر اور سینئر سیاست داں کاگوڈو تمپا کو سماجی خدمات کے شعبے میں منتخب کیا گیا ہے۔ فلمی دنیا سے اداکار اشوک، کے وینکٹ رمن  المعروف باباجی اور ٹیلی ویژن کے شعبے میں کے ایس رویندر ناتھ کے نام شامل ہیں۔ موسیقی کے شعبے میں ڈاکٹر سی اے شری دھر، ڈاکٹر اے نارائن سوامی اور بی مرلی کو منتخب کیا گیا ہے، جبکہ رقص کے شعبے میں ڈاکٹر ستیہ نارائن راجو کو اعزاز دیا جائے گا۔

لوک فنون کے شعبے میں داول صاحب عطار، گورما، پانڈپا دیولپا لمبانی، اے آر ستیہ نارائن، ایرنا رودراکشی، ایم شیولنگپا اور سریش رام چندر جوشی کے نام شامل ہیں۔ یکشگانا کے علاوہ تھیٹر، مجسمہ سازی، مصوری اور دستکاری کے شعبوں سے بھی فنکاروں کو منتخب کیا گیا ہے۔

دیگر شعبوں کے نمایاں ایوارڈ یافتگان
سماجی خدمات کے شعبے میں کاگوڈو تمپا کے علاوہ ڈاکٹر انادانیشورا مہاشیوگی، بسواراجو، ڈاکٹر ایس ایم ایلی، ڈاکٹر شیوانند مہاسوامی اور دیگر شخصیات شامل ہیں۔ ادب کے شعبے میں ڈاکٹر اندرا ہیگڑے کے ساتھ ویر ہنومان، پروفیسر نارائن گھٹہ، سی مہیشورپا چٹنلی، ڈاکٹر کری گوڈا بیچن ہلی اور ڈاکٹر سدھارام ہونکل کو منتخب کیا گیا ہے۔

تعلیم کے شعبے میں کرائسٹ یونیورسٹی کے وائس چانسلر فادر جوزف، شانتاپا دشونتھا، سنگیتا این کٹّی منی اور ڈاکٹر این ایس رنگاراجو کے نام شامل ہیں۔ طب کے شعبے میں ڈاکٹر وجیندر ہونورپا اور ڈاکٹر سجاتا ملیکارجن جالی، سائنس و ٹیکنالوجی میں پروفیسر راجاصاحب اے ایچ اور کینیڈا میں مقیم ڈاکٹر راج شیکھر مورتی کو منتخب کیا گیا ہے۔ کھیلوں کے شعبے میں اے وی روی، ڈاکٹر اے بی سبّیا اور این گریش کو ایوارڈ دیا جائے گا۔

وِشنو وردھن اور بی سروجادیوی کو کرناٹک رتن ایوارڈ
دریں اثنا، ریاستی حکومت نے کنڑا فلمی دنیا کی دو ممتاز شخصیات، آنجہانی اداکار ڈاکٹر وشنو وردھن اور سینئر اداکارہ بی سروجادیوی کو بعد از مرگ کرناٹک رتن ایوارڈ دینے کا بھی اعلان کیا ہے۔ وزیر شیوراج تنگڈگی کے مطابق یہ ایوارڈ 19 نومبر کو ایک خصوصی تقریب میں پیش کیے جائیں گے۔ اس تقریب میں تمل فلمی دنیا کے سپر اسٹار رجنی کانت اور اداکاراؤں لکشمی اور سوہاسنی کو مدعو کرنے کی کوشش کی جارہی ہے۔ یہ کرناٹک رتن ایوارڈ ہے، جو راجیہ اُتسوا ایوارڈ سے الگ اعزاز ہے۔