بنگلورو ، 30/ اگست (ایس او نیوز /ایجنسی) کرناٹک حکومت کی ضمانتی اسکیموں میں شامل گروہا لکشمی اسکیم اپنے 3 سال مکمل کرنے جا رہی ہے۔ اس موقع پر ریاستی حکومت کی جانب سے اہم سرکاری اور تاریخی عمارتوں کو گلابی روشنی سے روشن کرنے کا فیصلہ کیا گیا ہے۔

اس خصوصی تقریب کے تحت 30 اگست بروز اتوار شام 6 بجے سے رات 10 بجے تک بنگلورو میں ودھان سودھا، بیلگاوی میں سوورنا سودھا، میسور محل، چترادرگہ کے قلعہ، ہَمپی کا پتھریلا رتھ، منگلورو میں دکشن کنڑا ضلع ڈپٹی کمشنر کا دفتر اور بیلگاوی کا کِتّور چنّما چوک گلابی روشنی میں جگمگائیں گے۔

ریاستی حکومت کی اہم فلاحی اسکیم گروہا لکشمی کا مقصد ہر گھر کی خاتون سربراہ کو ہر ماہ 2,000 روپے کی مالی امداد فراہم کرنا ہے، تاکہ خواتین کو معاشی طور پر خودمختار بنانے اور انہیں بااختیار زندگی گزارنے میں مدد مل سکے۔ یہ اسکیم 30 اگست کو اپنے 3 سال مکمل کرے گی۔

حکومت کی جانب سے بتایا گیا کہ گروہا لکشمی اسکیم کے 3 سال مکمل ہونے کے موقع پر گلابی رنگ کی روشنی کا اہتمام کیا گیا ہے، جو خواتین کے وقار اور خودمختاری کی علامت کے طور پر پیش کی جا رہی ہے۔

سرکاری اعداد و شمار کے مطابق اب تک اس اسکیم کے تحت 1.20 کروڑ سے زائد مستحقین کے بینک کھاتوں میں 76,500 کروڑ روپے سے زیادہ کی رقم منتقل کی جا چکی ہے۔

حکومت کے مطابق اسکیم کے 3 سال مکمل ہونے کے موقع پر گلابی روشنی کے ذریعے خواتین کی معاشی خودمختاری اور سماجی بااختیاری کے پیغام کو اجاگر کیا جائے گا۔