میسورو، 2 اگست (ایس او نیوز/ایجنسی) وزیرِ اعلیٰ ڈی کے شیوکمار نے کہا ہے کہ حکومت تمام مذاہب کے ماننے والوں کے ساتھ مساوی برتاؤ کرنے کی پابند ہے اور ریاست میں امن، بھائی چارے اور سماجی ہم آہنگی کو برقرار رکھنا اس کی اولین ذمہ داری ہے۔
چامنڈی پہاڑی پر واقع چامنڈیشوری دیوی کے مندر میں درشن کے بعد ذرائع ابلاغ سے گفتگو کرتے ہوئے وزیرِ اعلیٰ نے کہا کہ ہر مذہب کے ماننے والوں کو اپنے عقائد، روایات اور مذہبی اقدار کے مطابق زندگی گزارنے کا مکمل حق حاصل ہے۔ حکومت کسی بھی مذہب کے ساتھ امتیازی سلوک نہیں کرے گی بلکہ سب کے ساتھ یکساں انصاف اور احترام کا رویہ اختیار کرے گی۔
انہوں نے کہا کہ عظیم شاعر کویمپو نے کرناٹک کو امن و محبت کا گلستان قرار دیا تھا اور اسی روایت کو برقرار رکھنا موجودہ حکومت کی ترجیح ہے۔ ان کے مطابق ریاست کی ترقی، خوشحالی اور استحکام کے لیے سماجی ہم آہنگی ناگزیر ہے۔
وزیرِ اعلیٰ نے بتایا کہ انہوں نے چامنڈیشوری دیوی کے حضور ریاست کی خوشحالی، اچھی بارش، کسانوں کی فلاح، تاجروں کی ترقی، طلبہ کی کامیابی اور عوامی خدمت انجام دینے والوں کو صبر، قوت اور استقامت عطا ہونے کی پرارتھنا کی ہے۔
انہوں نے کہا کہ حکومت عوامی خدمت، مساوات اور انصاف کے اصولوں پر کاربند رہتے ہوئے تمام طبقات کو ساتھ لے کر آگے بڑھنے کے لیے پُرعزم ہے، تاکہ کرناٹک امن، ترقی اور باہمی احترام کی روشن مثال بن سکے۔