کلبرگی،  3/ستمبر (ایس او نیوز) کرناٹک کے کلبرگی ضلع کے جیورگی میں ایک خوفناک سڑک حادثے میں کے کے آر ٹی سی بس میں سفر کرنے والے ایک نوجوان کا ہاتھ کٹ گیا۔ حادثہ جیورگی شہر کے ریلائنس پٹرول پمپ کے قریب پیش آیا۔

ذرائع کے مطابق جیورگی تعلقہ کے ریونور گاؤں کا رہنے والا ارون کمار کے کے آر ٹی سی بس میں کلبرگی سے جیورگی کی طرف سفر کر رہا تھا۔ اس دوران اس کا دایاں ہاتھ بس کی کھڑکی سے باہر تھا۔ ریلائنس پٹرول پمپ کے قریب پیچھے سے آنے والی ایک تیز رفتار لاری نے بس کو رگڑ دیا، جس کے نتیجے میں ارون کمار کا ہاتھ شدید زخمی ہوکر کٹ گیا۔

حادثہ اتنا شدید تھا کہ ہاتھ کا حصہ موقع پر ہی الگ ہوگیا۔ حادثے کے فوراً بعد مقامی لوگوں نے زخمی ارون کمار کو قریبی اسپتال منتقل کیا، جہاں اس کا علاج جاری ہے۔

اطلاع ملنے پر جیورگی پولیس موقع پر پہنچی اور حادثے کا معائنہ کیا۔ پولیس نے واقعے کے سلسلے میں مقدمہ درج کرکے مزید تحقیقات شروع کردی ہیں۔