نئی دہلی،29؍ستمبر (ایس او نیوز؍ایجنسی) سپریم کورٹ نے مرکزکو 4 ماہ کے اندرمعذور افرادکے لئے ترقی میں ریزرویشن لاگو کرنے کیلئے ہدایت جاری کرنے کی ہدایت دی ہے۔یہ ہدایات مرکز کی جانب سے دائر کردہ ایک درخواست پر جاری کی گئی ہیں جس میں سپریم کورٹ کے درج فہرست ذاتوں کے پروموشن میں ریزرویشن کے حق سے متعلق سابقہ فیصلے پر وضاحت مانگی گئی ہے۔ سپریم کورٹ نے کہا کہ ہمارے فیصلے میں کوئی ابہام نہیں ہے، حکومت 4 ماہ میں حکم پر عملدرآمد کرے۔ اس معاملے کی سماعت جسٹس ایل ناگیشور راؤ، جسٹس بی آر گوائی اور جسٹس سنجیو کھنہ کی بنچ کر رہی تھی۔ اس مقدمے میں اصل درخواست گزار سدراجو کی طرف سے پیش ہوئے وکیل راجن مانی نے کہا کہ قانون نافذ ہونے کے 5 سال گزرنے کے باوجود معذور افراد کے حقوق ایکٹ 2016 کے تحت ان کی ترقیوں کے حوالے سے کوئی ہدایت جاری نہیں کی گئی ہے۔ انہوں نے کہا کہ پی ڈبلیو ڈی کے لیے ریزرویشن کے نفاذ میں تاخیر ہورہی ہے کیونکہ ایکٹ کے تحت ضروری ہدایات جاری نہیں کی جارہی ہیں۔ وضاحت مانگنے والی حکومت کی درخواست فیصلے کو کمزور کرنے کی ایک اور کوشش ہے۔ جسٹس ایل ناگیشور راؤ نے سوال کیا کہ کیا مرکز نے ایسی ہدایات جاری کی ہیں؟ اے ایس جی مادھوی دیوان نے جواب دیا کہ پروموشن میں ریزرویشن فراہم کرنے کے لیے مرکز کی طرف سے ایسی کوئی ہدایت جاری نہیں کی گئی ہے۔ کچھ وضاحتوں کی روشنی میں ہدایات جاری نہیں کی جاسکتی ہیں جو ضروری ہیں، ہم وضاحت مانگ رہے ہیں تاکہ ہماری ہدایات کمزور نہ ہوں۔