بھٹکل، 9 اگست (ایس او نیوز): دو دہائیوں سے زائد عرصے کے وقفے کے بعد مشہور جیمبو سرکس ایک بار پھر بھٹکل پہنچ گیا ہے، جہاں شائقین کو خطرناک کرتب، مزاحیہ فن اور بین الاقوامی فنکاروں کی شاندار پیشکشوں سے محظوظ ہونے کا موقع مل رہا ہے۔
سرکس کا افتتاح ہفتہ کی شام انجمن حامئی مسلمین بھٹکل کے صدر جناب یونس قاضیا کے ہاتھوں عمل میں آیا۔ اس موقع پر سرکس کے منتظمین اور دیگر ذمہ داران موجود تھے۔
سرکس میں ڈبل ساڑی ایکروبیٹ، کامک چیئر ایکروبیٹ، باسکٹ بال شو، کینڈل بیلنس، رسی پر جگّلنگ اور رولر ایکٹ سمیت کئی دلچسپ اور حیرت انگیز مظاہرے پیش کیے جا رہے ہیں۔ ان میں فنکاروں کی مہارت، توازن اور جرات کا مظاہرہ شائقین کی خصوصی توجہ کا مرکز بن رہا ہے۔
جیمبو سرکس کی ایک خاص کشش منی پور، افریقہ اور تنزانیہ سے آنے والے فنکار ہیں، جو اپنی منفرد صلاحیتوں اور مختلف النوع کرتب کے ذریعے پروگرام کو بین الاقوامی رنگ دے رہے ہیں۔
منتظمین نے سرکس کو ہر عمر کے افراد اور پورے خاندان کے ساتھ دیکھنے کے لیے موزوں تفریحی پروگرام کے طور پر ترتیب دیا ہے۔ بچوں کے ساتھ ساتھ بڑوں کے لیے بھی مختلف دلچسپ اور سنسنی خیز مظاہرے پیش کیے جا رہے ہیں۔
24 سال بعد جیمبو سرکس کی بھٹکل واپسی کے باعث شہر اور اطراف کے علاقوں میں اس پروگرام کو لے کر خاصا جوش پایا جا رہا ہے اور بڑی تعداد میں شائقین کی آمد متوقع ہے۔
منتظمین نے عوام سے اپیل کی ہے کہ بھٹکل کے وینکٹاپور آئس فیکٹری کے قریب، نیشنل ہائی وے کے کنارے واقع وسیع میدان میں منعقد ہونے والے جیمبو سرکس میں شرکت کرکے عالمی معیار کے کرتب اور تفریحی مظاہروں سے لطف اندوز ہوں۔