کھٹمنڈو/نئی دہلی26جنوری(ایس او نیوز؍آئی این ایس انڈیا) بھارت نے ہفتہ کو نیپال کے لیے اپنا تعاون وسیع کرتے ہوئے 30 ایمبولینس اور چھ بسوں کا تحفہ دیا۔ بھارت نے ہمالیائی ملک کو یہ تحفہ ہفتہ کو دیا اور ہفتہ کو ہی بھارت اپنا 70 واں یوم جمہوریہ منا رہا ہے۔ کھٹمنڈو میں ہفتہ کو بھارتی سفارت خانے کے احاطے میں منعقد تقریب میں نیپال میں بھارت کے سفیر نے ایمبولینس اور بسوں کی چابی تنظیموں کو سونپی۔ بھارت حکومت 1994 سے نیپال میں صحت کی دیکھ بھال اور تعلیم کی خدمات میں پہنچ میں توسیع کرنے کے لئے پورے نیپال میں مختلف تنظیموں کو 722 ایمبولینس اور 142 بسیں دے چکی ہے۔ بھارتی سفیر نے گورکھا ریجمنٹ کے جنگ میں شامل ہوئے سابق فوجیوں کے اہل خانہ کو نقد رقم اور پورے ملک کے 53 اسکولوں اور لائبریریوں کو کتابیں تحفہ میں دیں۔ بھارتی سفیر نے ہندوستانی پرچم کی پرچم کشائی اور یوم جمہوریہ کے موقع پر ملک کے نام بھارتی صدر کا پیغام پڑھ کر سنایا۔واضح ہو کہ اس پروگرام میں 2 ہزار سے زائد لوگوں نے حصہ لیا۔