نئی دہلی26فروری(ایس او نیوز؍آئی این ایس انڈیا)کانگریس نے آج کہاہے کہ کرناٹک میں ایک پروگرام کے دوران بھارتیہ جنتا پارٹی کے صدر امت شاہ سے مودی حکومت کی کسان پالیسیوں سے متعلق جو سوال کیے گئے وہ اس کی اصلیت کی عکاسی کرتے ہیں اوربی جے پی کو اس سے تلملانا نہیں چاہیے۔کانگریس کے محکمہ مواصلات کے سربراہ رندیپ سرجیوالا نے ٹویٹ کرکے کہاہے کرناٹک کے کسانوں نے کھولی ڈھول کی پول -مودی حکومت کی کسان مخالف پالیسیوں کے خلاف آواز بلند کی۔گھبرائے اور تلملائے امت شاہ نے دبائی آواز، بولے نہیں چلے گی ایسی بحث۔
